Кавадарци, 24 февруари 2020 (МИА) – Усни опомени се изрекуваат до кавадарчани кои се греат горејќи црн и бел бор, затоа што станува збор за видови дрва кои содржат повеќе смола и загадуваат повеќе од вообичаените штво се користат за огрев, за МИА ја потврди Доне Илов, овластен инспектор за животна средина при Општина Кавадарци.
-Тоа што можеме да го направиме, е да ги опомениме. Бидејќи, сепак, четинарските или иглолисни видови дрва, се дозволени за огрев. Им укажуваме на штетноста за воздухот, кога се горат, бидејќи тие загадуваат повеќе од дабот или буката на пример, нагласи Илов.
Поединците кои на ваков начин обезбедувале греење оваа зима, вообичаено се правдале дека немаат друга алтернатива и мораат да горат бел и црн бор, за да се загреат.
Освен за огрев, вакви дрва во најлозарскиот дел на државата, според кавадарчани, се користат и при печење ракија.
Илов, исто така, упати апел доколку може да се користат претежно суви дрва за греење, бидејќи зелените повеќе загадуваат. свд/вг/
