Македонска Каменица, 18 февруари 2020 (МИА) – Во Македонска Каменица денеска се одржа најавениот Инфо-ден за спроведување и користење на Инструментот за претпристапна помош на Европската Унија за рурален развој ИПАРД 2014-2020. На настанот, како што информираа од подрачната единица на Министерството за земјоделство, шумарство и водостопанство присуствуваа земјоделци од Македонска Каменица, како и од населените места од оваа општина.
-Присутните земјоделци покрај можноста за поставување на прашања, имаа можност да се запознаат со ИПАРД можностите за рурални средини. Денешниот Инфо ден е одлична пракса и можност граѓаните да се запознаат со начините за диверзификација на фарми, развој на бизниси и со начините со кои преку програмата со јавен повик можат да обезбедат користење на средства, како и информација за потребните документи и деловните планови за работа, информираа од подрачната единица на МЗШВ.
Најголем интерес на Инфо денот предизвика мерката 3, која што овозможува инвестиции во физички средства за преработка и маркетинг на земјоделските и рибините производи.
-Корисници на оваа мерка можат да бидат правни и физички лица и задруги кои што се знаимаваат со преработка на млеко и млечни производи, преработка на месо и месни производи, преработка на овошје и зеленчук и други производи кои се наведени со оваа мерка. Исто така, мерката се однесува и на оние правни лица, коишто произведуваат енергија со преработка на примарна биомаса од растително и животинско потекло, со исклучок на биомаса од рибни производи, додадоа од подрачната единица на МЗШВ.
За повеќе информации заинтересираните земјоделци беа упатени кон веб-страниците на Телото за управување со ИПАРД Фондовите, Министерството за земјоделство, шумарство и водостопанство, Агенцијата за поттикнување на развој на земјоделството и Агенцијата за финансиска поддршка во земјоделството и руралниот развој. вс/вј/
