Обидите за заплашување на граѓаните не успеале да ја намалат излезноста на предвремените парламентарни избори во Србија, оцени новинарот Игор Бесерменји, кој директно од Белград се вклучи во отвореното студио на 4ТВ.
Според неговите сознанија, во текот на изборниот ден биле забележани нерегуларности во Белград и Панчево. Тој посочи дека е можно слични случаи да имало и во други делови од земјата, но нагласи дека интересот за гласање останал висок.
„Очигледно е дека ништо од обидите за заплашување на граѓаните и намалување на излезноста не успеало, бидејќи очекуваме излезност од над 70 отсто“, истакна Бесерменји.
Тој оцени дека, и покрај пријавените случувања што можеле да предизвикаат страв, голем број граѓани излегле да го остварат своето избирачко право.
Според Бесерменји, големото учество на гласачите е показател дека значителен дел од граѓаните сметаат оти во Србија се потребни промени.
