Четворица осомничени за двете разбојништва со смртни последици во скопските населби Хром и Ѓорче Петров се приведени, а според неофицијални информации од извори во истрагата, тие веќе ги признале кривичните дела во полициска станица.
Според истите извори, осомничените за свои жртви избирале повозрасни лица кои живееле сами. Напаѓачите наводно влегувале во нивните домови, ги врзувале и физички ги малтретирале, по што одземале пари и златен накит.
Министерството за внатрешни работи официјално потврди дека на 27 октомври се лишени од слобода четири лица – А.С. (22), Х.Е. (20) и К.А. (58), сите од Скопје, како и М.Р. (26) од Струмица.
Четворицата се осомничени за две кривични дела „разбојништво“ со последица смрт, извршени на 22 октомври во Хром и на 27 октомври во Ѓорче Петров.
Во првиот случај, на 22 октомври, животот го загубил 62-годишен маж, додека пет дена подоцна, на 27 октомври, во куќа во Ѓорче Петров било пронајдено безживотното тело на 76-годишна жена, со видливи траги од насилство.
Според неофицијалните сознанија, двајца од приведените учествувале во првото разбојништво, додека тројца биле вклучени во нападот врз 76-годишната жена.
Четвртиот осомничен, 26-годишниот М.Р. од Струмица, според изворите од истрагата, бил возач на групата и се сомничи дека помагал при извршувањето на кривичните дела.
Двата случаи, според досегашните неофицијални информации, имаат речиси идентичен начин на извршување. Жртвите биле физички нападнати и врзувани, а од нивните домови биле одземани пари и вредни предмети.
Извори од истрагата наведуваат и дека на местата на злосторствата биле пронајдени ДНК-траги за кои постои сомневање дека им припаѓаат на дел од осомничените. Овие сознанија засега не се официјално потврдени со објавени резултати од вештачењата.
Од МВР информираа дека постапуваат во координација со Основното јавно обвинителство Скопје и дека за четворицата е побаран краткотраен притвор во траење од 48 часа, со цел комплетирање на доказниот материјал.
„Во координација и по издадени наредби од ОЈО Скопје, а со цел комплетирање на целокупниот доказен материјал за понатамошна постапка, за лицата е побаран краткотраен притвор согласно член 170 во врска со член 165 од Законот за кривичната постапка, по што ќе биде поднесена соодветна кривична пријава“, изјави портпаролот на МВР, Гоце Андреевски.
Од Обвинителството појаснуваат дека постапката сè уште е во фаза на прибирање докази и дека засега не е донесена наредба за спроведување истрага.
Се очекуваат и резултатите од обдукциите на двете тела, кои треба да дадат дополнителни информации за точната причина и начинот на настапување на смртта.
Едно од клучните прашања што треба да го расчистат истражните органи е дали 62-годишниот маж и 76-годишната жена биле единствените жртви на осомничената група или постои поврзаност и со други досега нерасветлени кривични дела.
Надлежните институции треба да ја утврдат и конкретната улога на секој од четворицата приведени, како и да обезбедат докази за евентуалната поврзаност меѓу двата случаи.
