Министерот за правда Јетон Шасивари во периодот што претстои ќе оствари средби со политичките субјекти со цел да се деблокира процесот на носење измени и дополнувања на Изборниот законик, кој е дел од реформската агенда и во кој треба да бидат внесени препораките од ОБСЕ/ОДИХР.
Измените и дополнувањата на Изборниот законик беа изготвени од работна група и предложени до Собранието од група пратеници. Изборниот законик, иако беше дел од реформската агенда, не беше изгласан поради несогласувањата на пратеничките групи и политичките партии во врска со начинот на гласање на дијаспората и финансирањето на политичките партии.
Темата за Изборниот законик беше повторно отворена вчера на редовната координација со претседателот на Собранието, Африм Гаши. Тој на брифинг со новинарите изјави дека ги охрабрил првите луѓе на пратеничките групи доколку има согласност разговорите да продолжат.
