Утрински Весник
Македонија

ПРОГЛАСЕНА ЕПИДЕМИЈА ВО СКОПЈЕ: Западнонилската треска се шири, пет пациенти во тешка состојба

Img 1681.jpeg

Институтот за јавно здравје и Центарот за јавно здравје – Скопје прогласија епидемија на западнонилска треска во повеќе делови од главниот град, откако во изминатиот период е регистриран зголемен број заболени од вирусот.

Според информациите, епидемијата е прогласена на подрачјата на Кисела Вода, во реонот на Пржино, како и во Аеродром, Бутел, Гази Баба, Илинден, Драчево, Идризово, Јурумлери и Трубарево.

Во моментов Институтот за јавно здравје има регистрирано 26 случаи, од кои кај 24 лица е потврдено присуството на вирусот. Од регистрираните случаи, 25 се од Скопје, а еден пациент е од Велес.

Најголем дел од заболените се повозрасни мажи над 60-годишна возраст, кои претежно извршувале земјоделски и градинарски активности во приквечерните и раните утрински часови – период кога комарците се особено активни.

Состојбата кај дел од пациентите е сериозна. На Клиниката за инфективни болести досега биле регистрирани 29 пациенти, а петмина се во тешка здравствена состојба и се на механичка вентилација.

За жал, вирусот однесе и човечки живот. Во текот на викендот починал 83-годишен маж, кој имал и други придружни заболувања.

Здравствените власти апелираат граѓаните да преземат дополнителни мерки за заштита од каснување од комарци. Се препорачува поставување заштитни мрежи на прозорците и вратите, употреба на репеленти и избегнување подолг престој на отворено во периодот околу зајдисонце и во раните утрински часови.

Западнонилската треска е вирусно заболување кое најчесто се пренесува преку каснување од заразен комарец. Кај најголем дел од заразените инфекцијата може да помине без сериозни симптоми, но кај повозрасните лица и лицата со придружни заболувања постои поголем ризик од тешка клиничка слика.

Можете да прочитате

Пред изборите марширале со семејствата за „Пулс“, по изборите ретко доаѓаат, вели Наунов

Дали системот реагира навреме? Обвинителката Спасенка Андонова вечерва во 20:00 часот во „Ноќно студио“ на 4ТВ

Шасивари: Од заедничките предизвици до конкретни решенија за заштита на децата