Американскиот претседател Доналд Трамп се закани дека ќе го намали бројот на американски војници во Германија, што е најнов потег во растечкиот спор со сојузниците од НАТО. Заканата доаѓа откако германскиот канцелар Фридрих Мерц изјави дека Иран ја „понижил“ Америка во преговорите.
Трамп објави на својата социјална мрежа Truth Social дека неговата администрација „проучува и разгледува евентуално намалување на бројот на војници во Германија“ и дека одлуката ќе биде донесена „на краток рок“. Причината за реакцијата на Трамп е изјавата на германскиот канцелар Фридрих Мерц од понеделник, кој оцени дека тимот на Трамп бил надигран во преговорите со Иран за завршување на војната и повторно отворање на Ормутскиот теснец.
,,Иранците се очигледно многу вешти преговарачи, или поточно, многу вешти во тоа да не преговараат. Тие им дозволуваат на Американците да патуваат до Исламабад, а потоа се враќаат без никакви резултати“, рече германскиот канцелар. Мерц ја повтори својата критика вчера, нагласувајќи дека Европа „страда“ од последиците од затворањето на теснецот.
Трамп возврати обвинувајќи го Мерц дека мисли дека „е во ред Иран да има нуклеарно оружје“ и му рече дека „не знае за што зборува“. Минатата недела, Трамп го откажа второто патување на американските преговарачи во Исламабад, а разговорите за нуклеарната програма на Иран и Ормутскиот теснец се во застој оттогаш.
Нови тензии во НАТО
Иако Мерц се обиде да ја смири ситуацијата во средата, отфрлајќи ги коментарите на Трамп и велејќи дека нивниот однос е „добар како и секогаш“, заканата на претседателот за повлекување на трупите веројатно ќе предизвика загриженост во Берлин и низ цела Европа.
