Силно снежно невреме денес ја зафати Словенија, при што најпогоден беше североисточниот дел од земјата. Влажниот и тежок снег предизвика масовни прекини на електричната енергија, проблеми во водоснабдувањето и значителни сообраќајни застои, особено во Марибор и околината.
Во Марибор беше прогласена вонредна состојба. Пожарникарските служби интервенираа на десетици локации – отстрануваа паднати дрвја, извлекуваа заглавени возила и санираа оштетени електрични водови. До пладне без струја останаа десетици илјади домаќинства, а бројката и подоцна во текот на денот остана висока, со оглед на новите дефекти и отежнатиот пристап до оддалечените делови од мрежата.
Прекините во снабдувањето со електрична енергија доведоа и до нарушувања во испораката на вода. Локалните служби апелираа до граѓаните, по стабилизирањето на системот, да ги исплакнат домашните инсталации пред користење. Во дел од пумпните станици беше спроведена и превентивна дезинфекција, поради што можно е привремено да се почувствува мирис на хлор во водата.
Според метеоролозите, станува збор за т.н. „тежок снег“ – влажен и леплив, кој лесно ги крши гранките и предизвикува паѓање на дрвја врз патишта и далноводи. Во пониските предели наврнаа околу десет сантиметри снег, додека на повисоките подрачја, особено околу планинските масиви Похорје и Козјак, снежната покривка достигна значително поголема висина. Шумарските служби предупредија на појава на „снеголом“ и најавија дополнителни проценки на штетите.
Сообраќајот низ регионот се одвиваше отежнато. На одредени патни правци беа воведени ограничувања за товарни возила, а нефункционалните семафори во Марибор дополнително ја усложнија состојбата. Проблеми имаше и во железничкиот сообраќај поради паднати дрвја на шините, па на дел од линиите беше организиран автобуски превоз, со предупредување за можни доцнења поради зимските услови.
