Советот на јавни обвинители утре на својата 38-ма седница ќе ги разгледува кандидатурите за избор на нов јавен обвинител на Република Северна Македонија. Советот има законски рок од 15 дена да достави позитивно или негативно мислење до Владата за пријавените кандидати, по што ќе следува следната фаза од постапката за избор на нов државен обвинител.
Иако официјалната листа се уште не е јавно објавена, во јавноста веќе се споменуваат пет имиња кои претендираат да ја преземат функцијата по Љупчо Коцевски. Во трка за позицијата се актуелната в.д. државна обвинителка Анита Тополова-Исајловска, обвинителките Ленче Ристовска и Лидија Раичевиќ од Скопското јавно обвинителство, судијата во Кривичниот суд Ненад Савевски, како и поранешниот претседател на Кривичниот суд Владимир Панчевски.
Согласно процедурата, Советот на јавни обвинители доставува образложено мислење до Владата, по што Владата избира кандидат кој добил позитивно мислење и го предлага до Собранието. Новиот јавен обвинител се избира во Собранието со мнозинство од најмалку 61 глас. Доколку ниту еден од кандидатите не добие позитивно мислење од Советот, Владата ќе треба да предложи распишување нов оглас. Според законските одредби, актуелната в.д. обвинителка Тополова-Исајловска може да ја врши функцијата најмногу шест месеци.
