Претседателот на Србија, Александар Вучиќ, денеска изјави дека земјата успеала да го зачува мирот, стабилноста и животите на граѓаните во 2025 година, и покрај нелегалните активности, десетиците илјади собири и бројните напади врз полицијата, имотот и луѓето. На годишната конференција, Вучиќ ги истакна главните цели за 2026 година: зачувување на мирот и стабилноста, како и остварување на најдобра година во историјата на Србија во економски аспект.
– „Имаме две цели во 2026 година – зачувување на мирот и стабилноста и да ја направиме економијата најсилна во историјата на Србија. За тие цели ќе се фокусираме и ќе се насочиме кон остварување“, рече Вучиќ.
Претседателот потенцира дека Србија ќе продолжи да се придржува кон политиката на воена неутралност и мир во регионот, согласно Повелбата и резолуциите на ОН, не само во врска со Косово, туку и во однос на сите други кризи. Тој нагласи дека државата ќе продолжи да ја штити безбедноста на граѓаните и територијалниот интегритет од потенцијални закани.
Вучиќ истакна дека, и покрај „десетици илјади нелегални собири и напади врз полицијата и имотот“, стабилноста и мирот во земјата се зачувани, а животите на луѓето се заштитени. Претседателот додаде дека 2025 година е забележана како година со најниска стапка на криминал во историјата на Србија, со регистрирани 64.072 кривични дела, што е најниско ниво во последните 25 години.
