Трагична вест ја потресе европската боречка сцена – познатиот кик-боксер и ветеран Владимир Токтасинов почина на само 36-годишна возраст, поради срцев застој.
Токтасинов беше еден од најпознатите и најпочитуваните борци во тешка категорија, познат по својот технички стил и исклучителна физичка подготвеност. Во текот на својата професионална кариера оствари 51 победа, од кои 28 со нокаут, и 20 порази.
Светот на кик-боксот го запозна преку настапите во реномирани европски и светски промоции, меѓу кои и Glory – најпознатата организација во овој спорт, која вечерва потврди дека Токтасинов ненадејно починал.
Само пред три недели, тој се бореше на „Dracula Boxing Show“ во романскиот град Брашов, во главната борба на вечерта против Бенџамин Адегбуји, поранешен предизвикувач за тешкашка титула во Glory. Иако беше поразен, настапот беше поздравен со почит од публиката и колегите борци.
По веста за неговата смрт, неговиот последен противник Адегбуји беше видно потресен:
„Почивај во мир, пријателу. Не можам да поверувам дека пред неколку недели се боревме во ринг, а сега ова…“, напиша тој на Instagram.
Од Токтасинов се прости и хрватскиот ММА борец Роберто Солдиќ, кој на социјалните мрежи објави заедничка фотографија со порака: „Почивај во мир, брате“, придружена со емотикон на запалена свеќа.
Боречката заедница тагува по загубата на еден од најпочитуваните борци на европската сцена, кој зад себе остави впечатлива кариера и голем број пријатели во спортот.
