Дисциплинската комисија на Фудбалската федерација на Турција (ТФФ) објави денеска дека суспендирала 149 судии за период од осум до 12 месеци поради обложување на натпревари, додека против уште тројца се во тек дисциплински постапки.
Со истрагата на ТФФ е откриено дека од 571 судии лиценцирани за судење натпревари во професионалните фудбалски лиги во Турција, 371 имаат отворено сметки во спортски обложувалници, а 152 активно се обложуваат. Од судиите вклучени во скандалот, вкупно 22, од кои седум главни судии и 15 линиски судии, суделе натпревари во турската Прва лига.
„Судењето е чесна професија и секој што ќе ја оцрни таа чест никогаш повеќе нема да учествува во турскиот фудбал“, се закани претседателот на ТФФ, Ибрахим Хачиосманоглу.
ТФФ додаде дека десет судии се обложувале на повеќе од 10.000 настани, додека бројот на оние што се обложувале на најмалку 1.000 настани е 42.
Не е познато дали некој од суспендираните судии се обложувал и на натпревари што ги суделе.
