Светската здравствена организација (СЗО) предупреди дека заразните болести во Појасот Газа денес се надвор од контрола, при што само 13 од 36-те болници на територијата делумно функционираат.
„Без разлика дали станува збор за менингитис, дијареја, респираторни заболувања, зборуваме за огромна количина работа“, рече Ханан Балки, регионален директор на здравствената организација на ОН.
Во посебна изјава СЗО соопшти дека ги зголемила резервите со медицинска опрема за здравствените установи откога прекинот на огнот во Газа стапи во сила.
„Оваа недела повеќе од 220 палети со основни лекови и медицински потрошен материјал беа испратени од нашиот јужен магацин до партнерите што ги поддржуваат болниците во Газа“, се вели во соопштението на платформата „Икс“.
СЗО им се заблагодари на Европските операции за цивилна заштита и хуманитарна помош (ECHO) за нивната континуирана поддршка, објавува „Гардијан“.
Светската програма за храна (WFP) на ОН денес објави дека од почетокот на прекинот на огнот во Газа доставувала просечно 560 тони храна дневно, но дека тоа е сè уште под потребните количини. „Сè уште сме под она што ни е потребно. Прекинот на огнот отвори мал прозорец на можности и Светската програма за храна (WFP) многу бргу се движи кон зголемување на помошта во храна“, изјави портпаролката на WFP, Абир Етефа, за новинарите во Женева.
Војната уби најмалку 67.967 луѓе во Газа, претежно жени и деца, според палестинското Министерство за здравство.
