Првиот вицепремиер и министер за животна средина и просторно планирање Изет Меџити денеска повторно беше во теренска посета на опожареното складиште во Трубарево, каде е поставена мерна станица да го провери квалитетот на воздухот во реално време.
Меџити, како што информира Министерството за животна средина и просторно планирање, на чие барање е поставена мерната станица, беше придружуван од директорката на Државниот инспекторат за животна средина Ивана Гиновска и ректорот на Универзитетот „Гоце Делчев“ од Штип проф. д-р Дејан Мираковски.
Министерот Меџити во текот на посетата извршил увид во функционирањето на новоинсталираната мерна станица за квалитет на амбиентен воздух.
– Посетата има за цел да го потенцира значењето на мониторингот на квалитетот на воздухот и унапредувањето на животната средина преку меѓуинституционална соработка. Мерењата ќе се извршат секојдневно 24/7 за да се следи квалитетот на воздухот и навремено информирање на јавноста, која ќе има можност да ги следи податоците во реално време, се вели во соопштението.
