Русија сè уште бара Украина да го отстапи Донбас на истокот на Украина, кој не го контролира целосно, но е подготвена да го замрзне конфликтот на југот на земјата, долж актуелните линии на фронтот, изјави турскиот министер за надворешни работи Хакан Фидан, пренесе Бета.
Руската војска окупира околу една петтина од украинската територија. Москва смета дека има право на анексија на пет региони: во источен Доњецк и Луганск, кои го сочинуваат Донбас, во јужен Херсон и Запорожје, како и Крим, кој го анектираше во 2014 година.
За време на разговорите во Истанбул претходно оваа година, руските преговарачи бараа Украина целосно да се повлече од овие пет региони како предуслов за завршување на конфликтот.
Според Анкара, Москва, сепак, го променила својот став по неодамнешниот самит на Доналд Трамп и Владимир Путин на Алјаска.
-Така, Русите „се откажаа од ова барање и остануваат на линиите на контакт, со исклучок на еден регион… Во моментов постои прелиминарен договор за враќање (отстапување на Русија) на 25 до 30 проценти (од регионот Доњецк) и одржување на линиите на контакт во Запорожје и Херсон – рече Фидан за турскиот телевизиски канал ТГРТ Хабер.
Тој не прецизираше дали тој „прелиминарен договор“ е постигнат меѓу Москва и Вашингтон или меѓу Москва и Киев, ниту кога е постигнат. Украина досега категорично одбиваше какви било територијални отстапки.
