Полицијата во Демир Хисар денеска составила записник за констатиран прекршок против синот на Маја Лозановска, актуелната директорка на средното училиште „Крсте Петков Мисирков“. Случајот следи по петочниот инцидент, кога полициски началник бараше Лозановска да биде спроведена на носилка на информативен разговор, додека полицијата трагаа по печатите на училиштето за да може функцијата да ја преземе новоназначената директорка од страна на градоначалникот, Јасмина Дамчевска, пишува Слободен печат.
Во записникот се наведува дека во 10:30 часот синот на Лозановска влегол во училиштето без дозвола од Дамчевска. Според полицијата, со тоа тој го прекршил член 26 од Законот за прекршоци против јавниот ред и мир, кој предвидува парична казна од 50 до 150 евра за лица што нарушуваат ред во училиште во кое не се ученици или во други јавни објекти.
Синот на Лозановска одбил да го потпише записникот, а неговиот адвокат Жарко Стеваноски најави дека ќе го оспори, повикувајќи се на податоците во Централниот регистар каде како директорка сè уште е впишана Маја Лозановска, а не Јасмина Дамчевска, која фигурира како директорка во полициската евиденција.
