Минимум двајца вработени во „големите“ интернет портали, а еден вработен и едeн хонорарец во малите, предвидува амандманот на Предлог законот за изменување и дополнување на Законот за медиуми, што беше усвоен денеска на седница на Комисијата за транспорт, дигитална трансформација, животна средина и просторно планирање во Собранието.
Според амандманот поднесен од повеќе пратеници, а кој го образложи пратеникот Тони Јаревски од ВМРО-ДПМНЕ, во законот по ставот 9 се додаваат пет нови ставови. Како што беше образложено, надлежното регулаторно тело нема да го впише издавачот на онлајн медиумот интернет порталот во Регистарот на издавачи на онлајн медиуми-интернет портали доколку нема вработено најмалку две лица со полно работно време, односно ќе го избрише издавачот на онлајн медиумот-интернет порталот од Регистарот на издавачи на онлајн медиуми – интернет портали доколку го нема потребниот број на вработени согласно со член 15 став (3) алинеја 4 од овој закон.
По исклучок на ставот (11) од овој член, надлежното регулаторно тело ќе го впише издавачот на онлајн медиумот-интернет порталот во Регистарот на издавачи на онлајн медиуми-интернет портали доколку има вработено едно лице со полно работно време и ангажирано едно лице со договор на дело, како онлајн медиум-интернет портал со мал и/или специјализиран опфат, односно ќе го избрише издавачот на онлајн медиумотинтернет порталот од Регистарот на издавачи на онлајн медиуми – интернет портали како онлајн медиум- интернет портал со мал и/или специјализиран опфат доколку го нема потребниот број на вработени, односно ангажирани лица согласно со член 15 став (3) алинеја 4 од овој закон.
Во образоложението на амандманот се наведува дека тој се поднесува за да се направи дистинкција помеѓу онлајн медиуми-интернет портали кои публикуваат информативни, образовни и забавни содржини, односно дел од овие онлајн медиуми- интернет портали публикуваат само информативни, само образовни или само забавни содржини, истите се публикуваат во вид на текст, аудио или аудиовизуелен формат. Онлајн медиумите-интернет портали публикуваат различни содржини, и во различен формат, заради што во суштина се разликува структурата и бројот на вработени, односно ангажирани лица.
На седницата не беше прифатен амандманот на пратеникот Амар Мецановиќ од Левица, кој предлагаше интернет порталите да имаат вработено најмалку едно лице.
