Директорот на Специјализираната болница за геријатрија, Мухсин Арифи, е приведен под сомнение дека примил мито за да овозможи хоспитализација на пациент. Неофицијално, се спомнува сума од 20 илјади евра, иако таа засега не е потврдена.
Болницата згрижува возрасни пациенти во исклучително тешка здравствена состојба, со долги листи на чекање и ограничен број на кревети.
Приведувањето е извршено во координирана акција на Основното јавно обвинителство за гонење организиран криминал и корупција и Министерството за внатрешни работи. Приведени се две лица под сомнение за сторени кривични дела „примање поткуп“ и „примање награда за противзаконито влијание“.
„Се постапува за целосно расчистување на настанот“, информираат од Обвинителството.
Арифи претходно беше организациски директор во Психијатриската болница Бардовци. По професија е дипломиран архитект, а доаѓа од политичката партија Алијанса за Албанците.
