Под слоганот „Марш за ангелите“ во 12 часот и 5 минути, како симбол на задоцнетата институционална реакција, семејствата на починатите во трагичниот пожар во Кочани, придружени со голем број сограѓани, тргнаа од Паркот на револуцијата, на „црн“ марш низ улиците на градот.
Со фотографии од загинатите и со транспаренти на кои пишува „Ова не е несреќа, ова е убиство“, „Коруптивниот систем ги уби нашите деца“, „Марш за 59-те ангели“, граѓаните со молчење и плач тргнаа на марш за 60-те загинати во дискотеката „Пулс“. Прво се упатија кон Трговскиот центар, а оттаму кон зградата на Општина Кочани, Полициската станица и Основниот суд и Обвинителството. Порачаа дека е време да запре селективната правда.
По еден час молк, марширање, солзи и лелек, мајка на загината девојка од пред судот во Кочани постави прашање. Таа упати порака до правосудните институции, дека ќе чека одговор, кој и го скрати животот на нејзината ќерка која не успеа да се спаси од дискотеката „Пулс“, каде загинаа 60 лица, а почина и возач на Итната медицинска помош по 30-пати возење и разнесување на повредени.
„Едно прашање, кој го уби мојот ангел, кој го уби мојот херој, кој ги пеплоса тие ангелски лица?“, рече мајка на загината девојка.
Река од граѓани, облечени во црно, ги оплакуваат нивните согрѓани, роднини, пријатели.
