Американскиот претседател Доналд Трамп на јавноста и покажа нова „златна карта“ вредна пет милиони долари со сопствен лик, која ќе им овозможи на побогатите мигранти да добијат зелена карта, односно постојан престој во Соединетите Американски Држави.
„За пет милиони долари ова може да биде ваше“, им рече Трамп на новинарите во Ер Форс 1.
„Дали знаете што е овој билет? Тоа е златен билет, билетот за Трамп“, додаде американскиот претседател.
Трамп изјавил дека тој е првиот клиент на картичката, а повеќе копии ќе бидат достапни за помалку од две недели, пренесува „Њусвик“.
Програмата „златна карта“ ќе им овозможи на поединците кои инвестираат 5 милиони долари во американски компании да останат во САД, заменувајќи ја постоечката виза EB-5.
Поддржувачите на оваа мерка на Трамп тврдат дека САД на тој начин би можеле да соберат значителен капитал, додека критичарите сметаат дека приоритет на Вашингтон треба да биде привлекување квалификувани таленти.
„Златната карта“ е дел од пошироките напори за замена на сегашната имигрантска виза за инвеститори EB-5 со нова програма која дава американско државјанство на странски инвеститори во американски фирми.
Според постоечката програма EB-5, апликантите мора да платат помеѓу 100.000 и 200.000 американски долари како такси на американските служби за државјанство и имиграција (USCIS), да инвестираат помеѓу 800.000 и 1 милион американски долари и да создадат најмалку 10 работни места за американски работници.
