Забрана за употреба на пиротехнички средства во затворен простор, како и зголемување на казните за физички и правни лица, е предвидено во измените и дополнувањата на Законот за прекршоците против јавниот ред и мир, кој е ставен на дневен ред на денешната, 42-ра собраниска седница.
Ова законско решение е предложено од група пратеници од ВМРО-ДПМНЕ, како реакција на трагедијата во Кочани, каде што на 16-ти март, во пожар во дискотеката „Пулс“, животот го загубија 59 лица, а повеќе од 190 беа повредени.
Во објаснувањето на измените и дополнувањата на Законот, кој се предлага да се донесе по скратена постапка, пратениците наведуваат дека целта е да се направи итна промена во Законот за прекршоците против јавниот ред и мир, како одговор на трагичниот настан во ноќниот клуб во Кочани, кој предизвика сериозни последици по животот на голем број граѓани.
„Имајќи ги предвид заложбите на сите релевантни структури во државата за понатамошно превенирање на ризиците од неовластена злоупотреба на експлозивни материи – пиротехнички средства во затворен простор, се предлага измена на законската регулатива во насока на забрана на употреба на експлозивни материи – пиротехнички средства во затворен простор.“
„Конкретно, со предложениот закон се утврдува дека не е дозволена употреба на пиротехнички средства определени со закон во објекти и простории од затворен тип, а се предвидуваат и прекршочни глоби за физички и правни лица кои постапуваат спротивно на забраната.“
Во образложението на измените се посочува: „Имајќи предвид дека во процес на изготвување е нов Закон за експлозивни материи за цивилна употреба од страна на надлежното министерство, со конкретниот предлог се врши интервентна измена на Законот за прекршоците против јавниот ред и мир, до донесување на новите законски решенија со кои детално ќе бидат регулирани сите аспекти поврзани со експлозивните материи за цивилна употреба, во кои се опфатени и пиротехничките средства“.
Се предлага зголемување на казните, и тоа за физичко лице кое ќе го прекрши законот да бидат во вредност од 200 до 250 евра, додека за правно лице глобите да бидат од 500 до 1.000 евра во денарска противвредност за микротрговци, од 1.000 до 2.000 евра во денарска противвредност за мали трговци, од 3.000 до 6.000 евра во денарска противвредност за средни трговци и од 5.000 до 10.000 евра во денарска противвредност за големи трговци, а за одговорното лице во правното лице од 250 до 500 евра во денарска противвредност.
Пратениците веруваат дека со усвојување на предложените решенија ќе се овозможи санкционирање на прекршителите кои употребуваат пиротехнички производи во објекти од затворен тип и ќе придонесе кон зголемување на безбедноста на граѓаните, како и превенција од опасностите кои настануваат со употребата на пиротехнички средства.
На агендата на 42-та собраниска седница се предвидени и други законски решенија.
