Бројот на загинати во силниот земјотрес од 7,7 степени според Рихтер, што на 28 март го погоди Мјанмар надмина две илјади, соопштија денеска властите.
Над 3.900 луѓе се повредени, а како исчезнати се водат 270 лица. Поради големиот број на жртви во земјата е прогласена седумдневна жалост.
Спасувачките операции продолжуваат. Претходно денеска од урнатините беа извлечени тројца преживеани.
Земјотресот, чиј епицентар беше во близина на градот Мандалеј, на длабочина од околу 20 километри, е почувствуван и во Тајланд и во други азиски земји. Неколку минути подоцна имаше уште еден земјотрес со интензитет од 6,4 степени.
Голем број земји почнаа да испраќаат хуманитарна помош во Мјанмар и Тајланд по силниот земјотрес.
