Градоначалникот на Општина Сопиште соопшти дека пожарот што денеска околу 14 часот се прошири од Дрисла кон атарот на село Ракотинци, е успешно изгаснат. Огнот зафати околу 10 хектари нискостеблеста и борова шума, предизвикувајќи материјална штета, но, за среќа, нема други сериозни последици.
По добивањето на известувањето, екипи од противпожарното друштво на Општина Сопиште, заедно со Бригадата за противпожарна заштита на Град Скопје, веднаш реагираа и се вклучија во гасењето. Акцијата траеше речиси шест часа, а благодарение на брзата и координирана интервенција, пожарот беше успешно локализиран и спречено е негово понатамошно ширење.
Причините за избувнувањето на пожарот засега остануваат непознати, а надлежните институции работат на нивно утврдување.
„Од име на Општина Сопиште и од мое лично име, изразувам искрена благодарност до сите кои беа вклучени во справувањето со пожарот и вложија големи напори за негово локализирање“, порача градоначалникот.
