Министерот за дигитализација, Стефан Андоновски, денеска преку социјалните мрежи предупреди дека бројни корисници на мобилните апликации Телеграм и Вибер денеска пријавиле добивање на сомнителни пораки. Во овие пораки се бара верификација на лични податоци, податоци од дебитни картички или SIM и IMEI броеви, што претставува потенцијален обид за измама.
„Апелирам да се проверуваат испраќачите на овие пораки и во ниеден случај да не се споделуваат лични информации и банкарски броеви, како што се број на лична карта, трансакциска сметка или број на кредитна картичка“, напиша министерот Андоновски.
Тој посочи дека сајбер-безбедноста зависи од вниманието на секој поединец, па затоа е важно граѓаните да бидат претпазливи и да не наседнуваат на вакви измамнички пораки.
