Огромна дупка се отвори вчера на сообраќајна раскрсница во јапонскиот град Јашио, проголтувајќи камион и неговиот возач. Дупката широка 10 метри и длабока 5 метри се отворила околу 10 часот по локално време.
„Веруваме дека дупката се отвори поради пукање на цевка за канализација во сливот на реката Накагава“, рече Мотохиро Оно, гувернер на префектурата Саитама. И покрај напорите на спасувачите, возачот се уште е заробен во кабината која е исполнета со песок и кал.
Video: Part of a road intersection collapsed in Yashio City, Saitama and a truck fell into the hole. Efforts are underway to rescue the driver. pic.twitter.com/CPqXd3Y1lC
— Jeffrey J. Hall 🇯🇵🇺🇸 (@mrjeffu) January 28, 2025
Спасувачките тимови пумпале воздух во дупката за да му обезбедат кислород на возачот, објави Нипон ТВ. Во меѓувреме, недалеку од првата дупка се отвори уште една дупка. Локалните власти ги повикаа жителите во радиус од 200 метри да се евакуираат бидејќи гасовод минува под земја.
Возачот бил свесен и комуницирал со спасувачите на почетокот на акцијата за спасување, но подоцна се појавиле информации дека спасувачите повеќе не можат да комуницираат со возачот. Во дупката останала само кабината, додека остатокот од возилото бил успешно извлечен.
