Администрацијата на американскиот претседател Џозеф Бајден денеска ги укина ограничувањата што досега ја блокираа Украина да користи американско оружје за напади длабоко на руска територија, соопштија извори запознаени со ситуацијата, пренесува Ројтерс.
„Украина планира да започне со првите напади на голема оддалеченост во наредните денови“, велат изворите, но не откриваат детали од безбедносни причини, додека Белата куќа одби да коментира.
Промената на политиката доаѓа откако Русија распореди севернокорејски копнени трупи за да ги зајакне своите сили, што предизвика загриженост во Вашингтон и Киев.
Според неименувани извори на Ројтерс, првите длабоки напади најверојатно ќе бидат извршени со помош на ракети АТАКМС, кои имаат дострел до 300 километри.
Агенцијата наведува дека не е јасно дали новоизбраниот претседател Доналд Трамп ќе ја смени одлуката на Бајден кога ќе ја преземе функцијата на 20 јануари.
