Пратеничката од СДСМ и поранешна министерка за одбрана, Славјанка Петровска, во интервју за адио Слободна Европа изјави дека очекува владејачкото мнозинство наскоро да иницира закон за спојување на Агенцијата за национална безбедност (АНБ) и Агенцијата за разузнавање (АР).
Според неа, ова би можело да биде начин за „елегантно“ разрешување на директорот на АНБ, Бојан Христовски, поради контроверзиите поврзани со неговото назначување.
Дополнително, Петровска смета дека иако власта нема капацитет за ефикасно спроведување на вакво структурно спојување, под притисокот на случајот со Христовски, може да ја забрза постапката.
„Не би се изненадила ако законот за спојување биде поднесен до крајот на годината. Со тоа ќе избегнат директно разрешување на директорот и ќе назначат нов раководител на заедничката разузнавачка служба,“ истакна Петровска.
На прашањето за функционалноста на една обединета разузнавачка агенција, имајќи го предвид примерот на некои европски земји, таа оцени дека од прагматичен аспект, спојувањето е возможно. Сепак, предупреди дека не смее да биде само административно или законско решение.
„Клучно е да се вклучат и суштински реформи, како департизацијата и деполитизацијата на службите, за да се обезбеди вистинска ефикасност и независност,“ додаде Петровска.
