Премиерот Христијан Мицкоски направи пресврт во однос на неговата минатонеделна изјава во Собранието, кога побара одржување на предвремени парламентарни избори идната година, заедно со локалните. Изјавата предизвика бурни реакции меѓу партиите и отвори јавна дебата околу неопходноста од предвремени избори, при што опозициските партии, вклучувајќи ги СДСМ и ДУИ, истакнаа подготвеност за предвремено соочување со гласачите. Но, оваа недела Мицкоски го менува ставот, истакнувајќи дека иако ВМРО-ДПМНЕ е подготвена за избори, приоритетите на владата остануваат насочени кон исполнување на програмата и работење за доброто на граѓаните.
„Сега дали треба да потрошиме уште 10 милиони евра пари на граѓаните, ваши пари, да застане системот, да не испорачуваме реформи за да уште еднаш СДСМ се соочи со уште еден голем пораз или да избереме опција да работиме 4 години и да ги засукаме ракавите за доброто на граѓаните? Јас би ја одбрал втората опција,“ рече Мицкоски. Според него, приоритет е владината стабилност и посветеноста кон реализација на ветените проекти, а не дополнителни изборни циклуси кои би го дестабилизирале системот и би ги одложиле реформите.
Лидерот на ДУИ, Али Ахмети, пак, ја користеше изјавата на Мицкоски за предвремени избори како повик за одговорност и посветеност на зборот. „Видов понуда на Христијан Мицкоски за предвремени избори, веднаш одговоривме. Единствено решение се предвремените избори, за да се подобрат и тие, бидејќи јас ги разбирам, седум години и пол, осум години водеа пропаганда против ДУИ,“ рече Ахмети, алудирајќи на одговорноста на Мицкоски да се придржува кон своите најави.
Од друга страна, Биљал Касами, лидерот на партијата во коалицијата „ВРЕДИ,“ истакна дека Владата има стабилно мнозинство и дека нема потреба од предвремени избори. „Северна Македонија нема потреба за предвремени парламентарни избори, имаме стабилно мнозинство, владата сериозно работи на реализација на проекти што се ги ветиле на избори и во оваа фаза опозицијата е дезориентирана,“ нагласи Касами, подвлекувајќи дека тековната работа на владата е приоритет.
Темата за предвремени избори беше иницирана од страна на Мицкоски по критиките од опозицијата дека владата ги изневерила очекувањата на граѓаните и не го остварува ветеното особено во областа на евроинтеграциите. Но, со новата изјава на Мицкоски, тој сугерира дека фокусот ќе биде ставен на стабилноста на владата и исполнување на ветувањата, ставајќи крај на преговорите за нови избори во догледно време.
