Последователните сеизмички активности кои два месеца ја тресат Света Гора и крајбрежните области на општината Аристотел на Халкидики ги мобилизираа локалните власти.
Жителите и туристите се загрижени, имајќи предвид дека земјотресите се случуваат доста често, а последните три се со магнитуда поголема од четири степени според Рихтеровата скала, од кои последниот беше 4,3 степени минатата сабота.
Поширок состанок по ова прашање ќе се одржи утре во управната зграда на Халкидики, во Полигирос, со присуство на претседателот на Организацијата за сеизмичко планирање и заштита (ОАСП) и професорот по геологија Ефтимиос Лекас.
На состанокот ќе присуствуваат локални претставници и раководители од администрацијата на Халкидики, а иако се нагласува дека се работи за редовна средба на координативното тело, извесно е дека континуираната сеизмичка серија го попречила нејзиното одржување.
Во изјава за „Voria.gr“, професорот Лекас изјави дека оваа средба се смета за „стандардна процедура“ што се совпаѓа со неговото присуство на северот на Грција. Сепак, тој нагласи дека „се разбира, ќе се разговара и за прашањата кои се однесуваат на неодамнешната сеизмичка серија“.
Сеизмолозите внимателно ја следат појавата и не ја исклучуваат можноста да се работи за серија земјотреси, но она што ги загрижува е што нивната фреквенција и магнитуда не се намалува.
Според информациите што ги пренесоа грчките медиуми, активиран е раседот на западниот брег на Света Гора, а во последните денови има различни проценки за неговата должина. Првично имаше информации за расед со должина од четири до пет километри, меѓутоа, истрагата на областа, земјотресите и низа други податоци, доведуваат до заклучок дека раседот е поголем и е близу 10 километри, што ги загрижи експертите.
Овој расед се наоѓа на западниот брег на Света Гора на патот од Уранополис до Дафне, во морската област помеѓу вториот и третиот крак на Халкидики.
Неодамнешните земјотреси особено беа почувствувани на Света Гора, а жителите и туристите во Уранополис, Јерисос, Неа Рода и други области на општината Аристотел беа прилично вознемирени. Земјотреси се почувствувани и во Ситонија.
Градоначалникот на општината, Аристотел Стелиос Велиандос, во интервју за Voria.gr рече дека, иако ваквите средби се одржуваат редовно, сега има „дополнителна причина“, мислејќи на сеизмичките активности кои зачестија во последните години и предизвикуваат загриженост. Тој додаде дека на средбата првенствено ќе се разгледа „нивото на подготвеност на општината и регионот во случај на посилен земјотрес, како и места за евакуација и собирање на жителите при такво сценарио“.
Атанасиос Ганас, директор за истражување на Геолошкиот институт на Националната опсерваторија во Атина, предупреди на опасност од можен земјотрес во областа Лариса поради уште еден расед од 11 километри што минува низ градот.
– Знаеме дека во Лариса има расед што минува низ градот, кој е мапиран и е со должина од најмалку 11 километри, што значи дека може да предизвика земјотрес со јачина од над шест степени според Рихтеровата скала, можеби и 6,2 степени – изјави на почетокот на јули за грчкиот јавен сервис „ЕРТ“.
Ганас рече дека во околината на Лариса има и други раседи кои се протегаат на исток кон Платикамбо и на север кон Гиртона, и понатаму на север кон Родија, кои исто така бараат внимание“, прецизирајќи за ЕРТ дека треба повеќе да се направи на раседот во Лариса кој е мапиран, но потребно е да се најдат податоци за тоа кога се случил последниот земјотрес.
Тој ги критикуваше и градските власти што дозволуваат изградба на високи згради во областа каде што е мапиран расед.
– Како е можно надлежните органи да издаваат дозволи за десеткатници? Сметам дека тоа е криминално не само за Лариса, туку и за Волос и сите градови во Тесалија. Нашите градови се изградени на или во близина на дефекти и мора да има планови за евакуација и бегство. Катни згради не можат да се натрупуваат во станбени области. Тоа е голема грешка и мора да се прекине. Предупредувам на опасност – изјави Ганас.
