Директорот на Агенцијата за катастар на недвижности, Иван Живковски, најави дека наскоро ќе се намалат цените на услугите на Агенцијата, достигнувајќи намалување и до 75 проценти. Оваа одлука доаѓа по бројните реакции во јавноста на покачувањето на цените од страна на претходното раководство во февруари 2024 година.
„По завршувањето на потребната законска постапка, граѓаните наскоро ќе можат да ги добијат услугите на Агенцијата по значително пониски цени,“ изјави Живковски. Според него, доколку сега се склучи договор за купопродажба на стан, потребно е да се изврши упис во катастарот на четири имотни листа – за станот, земјиштето под зградата, заедничките простории и паркинг-местото. Во моментот за оваа услуга се плаќа 5 000 денари, но со предложените измени, цената ќе се намали на 1 250 денари по правен основ.
Живковски исто така најави намалувања и во случаите на оставински постапки и договорите за подарок, каде што наплатата ќе биде 1 250 денари по правен основ за една катастарска општина, без разлика на бројот на имотните листови.
Директорот истакна дека Агенцијата има клучна улога во регулацијата и развојот на гео-просторната инфраструктура, урбанистичкото планирање и пазарот на недвижности. Промените во цените се само вовед во најголемата реформа и модернизација на катастарот на недвижностите во државата, нагласи Живковски.
