Градоначалникот на општина Карпош и претседателски кандидат Стевчо Јакимовски и неговото семејство се нашле во незавидна и шокирачка ситуација, откако во редовна процедура се обиделе да извадат Извод од матичната книга на венчани лица.
Имено неговиот син и неговата снаа поднеле барање до Управата за водење на матичните книги да им се издаде Извод од матичната книга на венчани лица.
Но вистински шок следел откако бил изготвен документот, а семејството Јакимовски наместо документот што го барало, добило Извод од матичната книга на умрени лица, со датум од претходната година.
„Денот кога била правена нивната свадба е ставен како ден на нивната смрт. Можете ли да замислите овие млади луѓе, секоја година на што ќе ги потсетува годишнината од нивната свадба и вом каков шок сега се наоѓаат? Оваа прес конференција што сега ја држам е уште една потврда зошто младите ја напуштаат Македонија. Не од економски причини, туку од лошо водење на институциите во државата. Јас сум длабоко убеден дека овој перспективен и талентиран кадар со име Дијана Антонијевиќ е вработена или од штабот на СДСМ или од штабот на ВМРО-ДПМНЕ. Целата наша администрација е наполнета со нивните кадри и во зависност од тоа дали се власт или опозиција нив државата не им чини а всушност не чини заради такивте кадри“ изјави Јакимовски додавајќи дека ова е дополнителна причина зошто тој се кандидирал за претседател на државата.
