Министерството за здравство во Газа соопшти дека четвртиот пациент починал во болницата „Насер“ бидејќи при вчерашниот израелски упад во тој објект било прекинато напојувањето со електрична енергија, а снабдувањето со кислород било ограничено.
Претходно, тројца пациенти починаа во текот на ноќта во таа здравствена установа во Кан Јунис, пренесува „Ал џезира“. Портпаролот на палестинското Министерство за здравство во Газа, Ашраф ал-Кидра, вчера изјави дека Израел извршил масовен упад во болницата Насер по што следувале истрели од огнено оружје, при што биле повредени неколку раселени лица, кои се засолниле таму.
Тој рече дека армијата им наредила на лекарите да ги преместат сите пациенти во постара зграда, која не е соодветно опремена за лекување, пишува „Тајмс оф Израел“.
Израелските одбранбени сили (ИДФ) претходно соопштија дека имаат „веродостојни разузнавачки информации“ оти Хамас држел заложници во болницата и дека се сомневаат дека има и други внатре.
Израел го обвинува Хамас дека користи болници и други цивилни структури за да ги заштити своите борци, што Хамас го негира.
