Манчестер Сити го освои Суперкупот на УЕФА победувајќи ја Севилја по подоброто изведување пенали. Во регуларните 90 минути мечот заврши 1:1, а избраниците на Пеп Гвардиола беа прецизни петпати од белата точка.
По освојувањето на трофејот, Пеп Гвардиола изјави дека нема премногу време за славење.
Сити игра важен натпревар веќе в сабота против Њукасл во второто коло од Премиер лигата на „Етихад“. Истовремено, тој ја критикуваше Премиерлигата, која утврди дека натпреварот треба да се одигра в сабота, иако и Сити и Њукасл можеа да играат во недела или понеделник.
Сепак, критиките на Пеп не застанаа тука.
„Во мојата прва претсезона имав 25 дена да се подготвам за првиот официјален натпревар против Сконто Рига во квалификациите за Лигата на шампионите. Сега ти даваат четири или пет дена, а потоа погледнете колку повредени играчи има со скинати вкрстени лигаменти. Тие ве тераат да одите во Азија, во САД, тоа се навистина тешки натпревари… Играчите паѓаат затоа што шоуто мора да продолжи. Ако Куртоа не е таму, некој друг ќе биде таму, нели? И ако Милитао не е таму, тогаш ќе има некој друг. Ако го нема Кевин Де Брујне, тогаш ќе има некој друг. Ова е изгубена битка освен ако играчите не застанат во своја одбрана и не кажат дека нема да играат. Тоа е изгубена битка, ништо нема да направат УЕФА или ФИФА“, изјави Гвардиола.
