По неколкудневните големи поплави во Норвешка, денеска делумно се урна браната на хидроцентралата на норвешката река Глома.
Локална телевизија покажа дека водата избива низ пукнатините во структурата на браната, објави „Ројтерс“.
На оваа река има и значителен воден пат, но поради поплавувањето речниот сообраќај е во прекин.
Повеќе од 600 луѓе се евакуирани во регионот северно од главниот град Осло, откако обилните дождови предизвикаа лизгање на земјиштето низ планинскиот дел на јужна Норвешка, соопшти претходно денеска норвешката полиција.
Норвешката управа за водни ресурси издаде црвен метеоролошки аларм за поплави и лизгање на земјиштето во областите во јужна Норвешка, а метеоролозите издадоа предупредување на највисоко ниво за екстремно обилни врнежи.
Илјадници луѓе останаа без струја во јужна Норвешка по бурата „Ханс“, придружена со силен дожд која што погоди делови од Скандинавија и Балтикот, што резултираше со излевање на реки и оштетување на патиштата, објави „АП“.
