Најмалку три лица, меѓу кои и мајка на десет деца од северен Лондон, загинаа во сообраќајна несреќа на автопатот А26, јужно од Ленс во северна Франција. Меѓу повредените има и многу деца, соопшти полицијата.
Почина Миријам Позен, 49-годишна мајка на десет деца од Стемфорд Хил. Таа извесно време патувала во комбе со неколку членови на семејството, пренесува metro.co.uk.
Меѓу тешко повредените е и нејзиниот сопруг, познат локален рабин, јавува еврејскиот информативен сајт „Мацав“. Во несреќата загинаа уште две лица – 75-годишна жена и 45-годишен маж.
Портпаролот на брзата помош изјави: „Три лица загинаа, а десетици се повредени, меѓу кои и многу деца. Комбето со седумчленото британско семејство беше едно од трите возила вклучени во несреќата“.
„Една 40-годишна Британка почина веднаш, заедно со уште двајца кои патуваа во другото возило. Другите патници – на возраст меѓу шест и 48 години – беа пренесени во болница во Камбраи и Арас.
Неколку жртви, меѓу кои и едно 14-годишно момче, се борат за живот на интензивна нега“, изјавија надлежните..
Судирот се случил во неделата нешто по 18 часот меѓу градовите Невил-Сен-Васт и Телус.
Во другото возило имало четири лица, меѓу кои уште една жена и маж кои загинале. Останатите двајца патници во тој автомобил биле 14-годишно момче и 79-годишен маж, кои се во критична состојба.
Третото возило било автомобил со четворица патници од кои три деца, а сопатниците биле на возраст од шест до 33 години. Делницата од автопатот А26 била затворена до доцна во ноќта, бидејќи на местото на настанот излегле шест екипи за итна помош.
На местото на несреќата пристигнале и околу 60 пожарникари кои се обидувале да ги спасат настраданите. Обвинителите во блискиот Арас започнале истрага за судирот.
Во меѓувреме францускиот регионален државен префект Жак Билан изјави дека на сведоците на страшната несреќа им се нуди психолошко советување. Несреќата се случила во екот на празничната сезона, кога илјадници британски возачи го минуваат Ла Манш.
