Борците на групата „Вагнер“ лоцирана во Белорусија би можеле да се претстават како мигранти и да влезат во Европската унија, предупреди полскиот премиер Матеуш Моравјецки. Тој тврдеше дека платениците може да се претставуваат како белоруски граничари за да им помогнат на мигрантите да влезат во ЕУ или дури да се претставуваат како мигранти и да влезат во Унијата.
„Сега ситуацијата станува уште поопасна“, рече тој на прес-конференција за време на посетата на фабриката за оружје во Гливице во јужна Полска.
„Ова е секако чекор напред кон иден хибриден напад на полска територија“, додаде тој. Неколку илјади борци на Вагнер преминаа во Белорусија по краткотрајниот бунт против Кремљ во јуни.
Ним им беше понуден избор да се приклучат на редовната руска армија или да одат во Белорусија, близок сојузник на Москва. Во четвртокот, полскиот министер за внатрешни работи рече дека Полска, Литванија и Летонија би можеле заеднички да ги затворат границите со Белорусија доколку има инциденти со групата долж нивните граници.
Минатиот викенд белорускиот претседател Александар Лукашенко инсистираше на тоа дека платениците на Вагнер ќе бидат задржани во централна Белорусија.
„Тие сакаат да одат на Запад, на патување во Варшава“, се пошегува Лукашенко во разговорот со Путин. „Но, секако, ги чувам во централна Белорусија, како што се договоривме“.
