Пожарникарите во Грција со денови се борат со катастрофалните пожари кои избувнаа во екот на туристичката сезона во земјата. Десетици илјади луѓе беа евакуирани, многу туристи беа принудени нагло да ги прекинат годишните одмори и да побегнат од огнената стихија, која најмногу погоди дел од островите.
Но, дури и во најтешките моменти, можно е да се најдат херои кои се подготвени да им помогнат на најмалку заштитените, во случајот – животните. Имено, на островот Родос деновиве е снимен пожарникар како спасува два зајаци и маче од пожар меѓу селата Киотари и Генади. Тој ги зел преплашените животни во раце и ги однел на безбедно, пишува „Индекс“.
За жал, многу други немале таква среќа. Од Грција стигаат вознемирувачки и потресни сцени. Во градот Волос во централна Грција, околу 326 километри северно од Атина и 215 километри јужно од Солун, овците морале да бидат поставени на фудбалски терен бидејќи пожарот ги уништил локалните фарми.
Истовремено, во Велестин во префектурата Магнезија се снимени крави со изгореници додека околу нив беснее пламен. Не беше подобро ниту на островот Крф. Малкумина можеа да останат рамнодушни на глетката на школка од желка која лежеше на јагленисано тло кај селото Луцес. А вистинската големина на штетата и катастрофата допрва треба ќе се знае.
