Приоритет за Барселона и тренерот Чави Ернандез, во преодниот рок ќе биде да најдат замена за Серхио Бускетс.
Чави побара во клубот да дојде Мартин Зубименди од Реал Сосиедад или Џошуа Кимих од Баерн Минхен. Двајцата фудбалери изјавија дека не сакаат да ги напуштат своите клубови.
„Повеќе сум мотивиран да ја наследам „четворката“ на Асиер Иљараменди, отколку да ја добијам „петката“ на Бускетс. Желба ми е да останам“, изјави Зубименди, на кого легендата на Сосиедад, Иљараменди му го предаде дресот со број четири.
Слично размислува и Кимих.
„Секако дека гласините за интересот на Барселона стигнаа до мене, но тие не ме засегаат многу. Имам уште две години во договорот со Баерн и имаме големи планови тука“, изјави Кимих по синоќешниот пријателски натпревар Германија-Украина (3:3).
Кој ќе биде план Ц?
Се шпекулира дека стручниот штаб и раководството се согласиле дека добро решение може да биде Софијан Амбрабат.
Неговата цена изнесува околу 30 милиони евра. Парите за да го купи Амрабат Барселона ќе ги приходува веројатно од продажбата на Франк Кеси.
