Манчестер јунајтед по секоја цена сака да се ослободи од услугите на Хари Мегваер. Клубот е подготвен да го исплати Мегваер за тој да го напушти клубот.
Во 2019 година, Хари Мегваер пристигна во Манчестер јунајтед од Лестер за рекордни 80 милиони фунти. Сепак, престојот на најскапиот дефанзивец на светот на „Олд Трафорд“ се претвори во вистински кошмар од кој немаше излез.
Правеше комични грешки, стана предмет на потсмев ширум светот, а навивачите дури му се закануваа со бомби доколку не го напушти клубот.
Сепак, тој и покрај се остана во клубот. Тој има уште две години од договорот вреден 190.000 фунти неделно, но Манчестер јунајтед има намера да се ослободи од него веќе на крајот на сезоната.
Клубот на 30. годишниот дефанзивец ќе му понуди 10 милиони фунти за раскин на договорот. Ќе добие пари и ќе може да го напушти клубот без обесштетување.
Понудата е на маса. Сега се чека одговорот на Мегваер, но проблемот е што тој претходно изјави дека сака да остане на „Олд Трафорд“ и да се бори за своето место во тимот.
Оваа сезона, Мегваер започна само 16 од 61 натпревар на „црвените ѓаволи“. Се шпекулира дека тој би можел да ја продолжи кариерата во Серија А.
Хари Мегваер одигра вкупно 175 натпревари во дресот на „црвените ѓаволи“.
