Германската полиција уапси специјалист по кардиологија суспендиран од берлинската болница Шарите поради сомнение за убиство, соопшти денеска германското обвинителство.
Според Ројтерс, кардиологот е осомничен дека свесно давал високи дози на седативи на двајца критично болни пациенти на интензивна нега кои починале како резултат на тоа.
Обвинителите започнаа истрага по суспензијата во 2022 година, но налогот за апсење можеше да биде издаден само по добивањето лекарски извештај кој покажува дека високите дози на седативи не се медицински оправдани, се додава во соопштението.
Агенцијата потсетува дека на тоа кардиолошко одделение имало вкупно четири сомнителни случаи, но било потврдено дека само во два случаи била неоправдана употребата на седативи.
Осомничениот, како што се наведува во соопштението, денеска ќе се појави пред берлинскиот суд.
