Фудбалерот на Бетис Набил Фекир ќе го пропушти остатокот од сезоната поради повреда на коленото, соопшти клубот.
„Фекир доживеа хиперекстензија на левото колено на еден од последните дуели на натпреварот против Елче (3:2) минатиот петок“, се вели во соопштението на Бетис и се додава дека ги повредил предните вкрстени лигаменти на коленото.
Клубот од Севиља додаде дека 29. годишниот офанзивен играч за врска ќе биде опериран во наредните денови.
Фекир се пресели во Бетис од Лион во 2019 година, а минатата година со клубот од Андалузија го освои Копа дел Реј.
По 23 одиграни натпревари, Бетис е на петтото место во Примера, а два бода го делат од пласман во Лигата на шампионите.
Клубот од Севиља во осминафиналето од Лигата на Европа ќе игра против Манчестер Јунајтед, а натпреварите се закажани за 9. и 16. март.
