„Коалицијата СДС и Левица како по правило не дава поддршка на буџетот во општините кај што градоначалниците со од ВМРО-ДПМНЕ. Ова покажува дека коалицијата од градот Скопје се префрла и во други општини. Таков е примерот и со општина Прилеп кај што советниците на Левица и СДС сложно одбија да дадат поддршка на буџетот за 2023 година со кој се предвидува рехабилитација на 50 улици, изградба на кружен тек во центарот на Прилеп и катна гаража. Советниците на Левица и СДС беа против изградба на доводен цевковод во село Канатларци, но и против други проекти во интерес на граѓаните“ соопштуваат од опозициската ВМРО-ДПМНЕ.
Оттаму порачуваат „колку и да глумат, координирана активност во советите во другите општини ги издава“.
„Не даваат поддршка на изградба на западен булевар во Гевгелија, а во Охрид не даваат подршка на реконструкција на улици, 15 детски игралишта, 2 мултифункционални игралишта, а беа и против нова опрема и механизација за јавните претпријатија. Во Бутел не дадоа поддршка на уредување на кејот на река Серава, а во Свети Николе не дадоа поддршка на дваесет милиони за нови улици, водоводи и канализациски системи. Во Аеродром сложно одбија да дадат поддршка на нови детски градинки и паркови, а во Велес не беа за инвестирање на 1,5 милиони евра во нови улици и патишта“ се вели во партиското соопштение.
