Стотици илјади граѓани се собраа денеска во Прага против планот на владата на премиерот Андреј Бабиш за промена на финансирањето на јавната телевизија и радио. Организаторите од движењето „Милион моменти за демократија“ проценија дека на собирот во паркот Летна присуствувале околу 350.000 луѓе.
Демонстрантите побараа повлекување на предлогот, предупредувајќи дека буџетското финансирање може да ја зголеми политичката зависност на јавните сервиси. Бабиш ги отфрла обвинувањата дека се загрозува медиумската слобода.
Предлогот предвидува укинување на месечната радиодифузна такса од 205 чешки круни по домаќинство и преминување на финансирање од државниот буџет. Планирано е и намалување на средствата за околу 15 проценти.
Владата тврди дека ја исполнува обврската за намалување на финансискиот товар врз граѓаните. Противниците, пак, предупредуваат дека редакциите ќе станат поранливи на притисоци. Предлогот поминал прелиминарно гласање, но го очекува натамошна парламентарна расправа.
На протестот му претходеше еднодневен штрајк на вработените во јавната телевизија и радио на 3 ноември, поддржан од синдикати, универзитети, студенти и уметници.
Незадоволството се засили и поради начинот на кој владејачкото мнозинство ја придвижи постапката во парламентот, со ограничување на времето за опозициските говорници и гласање во раните утрински часови.
