Повеќе од 45.000 мигранти илегално го преминаа Ла Манш со мали чамци за да стигнат до бреговите на Англија во 2022 година, што е рекорден број и покрај неколкуте планови на конзервативната британска влада за борба против политички чувствителниот проблем.
Според пресметката на Франс прес врз основа на податоците на Министерството за одбрана, 45.756 мигранти го поминале опасниот премин преку една од најфреквентните морски патишта во светот во споредба со само 28.526 во 2021 година, што веќе беше рекордна година.
Иако повеќето пристигнувања беа во лето, со дневен рекорд од 1.295 мигранти кои пристигнуваа за 24 часа на 22 август, пристигнувањата продолжија и во зимските месеци со 1.745 пристигнувања во декември.
Минатиот месец, гумен брод со десетици мигранти од Франција потона во раните утрински часови на 14 декември. Четворица од нив ги загубиле животите, Авганистанци и Сенегалци според првите елементи на истрагата, а билансот можел да биде потежок, 39 од нив биле спасени од рибарски брод кој бил во близина.
Ноќта меѓу 23 и 24 ноември 2021 година, 27 мигранти на возраст меѓу седум и 46 години загинаа во потонувањето на нивниот гумен чамец.
Поради зголеменото затворање на пристаништето Кале на француската страна и тунелот под Ла Манш од 2018 година, дојде до експлозија во бројот на премините на тој воден пат со мали чамци.
Прашањето е многу чувствително за британските конзервативци, кои уште од Брегзит ветија дека ќе ја преземат контролата врз границите, но иако објавуваа план по друг, бројот на премини продолжува да расте, а системот за азил во ОК е преоптоварен. .
Минатата година Лондон склучи договор со Руанда за испраќање мигранти кои пристигнале илегално во таа земја, без разлика од каде доаѓаат и без да чекаат да се разгледа нивното барање за азил.
