Арктичкиот бран однесе 62 животи во 12 држави ширум САД, а најлоша е ситуацијата во западниот дел на Њујорк. Само во државата Њујорк, бројот на загинати во метрополитенската област Бафало се искачи на 28 лица. Снегот во Бафало е висок преку 4 метри и не престанува да паѓа.
Вториот по големина град во државата Њујорк е целосно парализиран од бурата што, според гувернерката Кејти Хокал, се случува „еднаш во животот“.
Како што пренесува „Гласот на Америка“, областа Бафало е целосно парализирана од една од најлошите природни катастрофи во својата историја.
Жртвите биле пронајдени во нивните автомобили, домови и на отворено. Некои загинале додека го чистеле снегот. На социјалните мрежи беа објавени и снимки од надзорните камери на кои се гледа како разбојници ограбуваат излози и напуштени куќи.
„Некои од жртвите се пронајдени по два дена поминати во автомобили завеани и заглавени во снегот. Очекуваме бројот на жртвите да продолжи да расте“, изјави Марк Полонкарт, од округот Ири.
Илјадници граѓани во Бафало се уште се без струја, а аеродромот е затворен од минатиот вторник. Екстремните временски услови со температури до минус 50 степени и обилни снежни врнежи ја зафатија областа од Големите езера во близина на Канада до реката Рио Гранде долж границата со Мексико. Околу 60 отсто од американското население беше изложено на невремето.
Повеќе од 15.000 летови беа откажани низ САД во последните денови, а многу патници беа принудени да летуваат на аеродромите во Атланта, Чикаго, Денвер, Детроит, Њујорк.
