„Со денешното соопштение, СДСМ прави уште една груба манипулација на јавноста, пласирајќи невистини кои имаат за цел да ја дефокусираат јавноста од тешката економска состојба во која се наоѓа државата, сиромаштијата и високото ниво на криминал и корупција за кое веќе подолг временски период алармираат и меѓународните фактори“ реагираат од скопската општина Аеродром.
„Општина Аеродром во изминататата една година покажа како се раководи со локалната самоуправа и како се работи во согласност со законите. Година во која се направени многу повеќе реформи и проекти од четиригодишното владеење на СДСМ во Аеродром, а потврда за ова се признанијата и наградите кои општината ги доби во 2022 година, како и евидентното задоволство кај граѓаните. Досегашното работење на Општина Аеродром ќе биде одбележено по реализација на низа проекти, збор кој е непознат за СДСМ затоа што тие се политичка партија која во историјата на независна Македонија направи историско најголемо задолжување и највисоко ниво на корупција, факт кој сите релевантни и меѓународни фактори го потврдија“ се вели во реакцијата.
Оттаму дополнуваат дека „зелената обврзница е проект кој ќе донесе реализација на голем број инфраструктурни проекти во Општина Аеродром кои сериозно ќе го подобрат животот на граѓаните, но и ќе значат континуитет на една зелена трансформација која Општина Аеродром ја започна во 2022 година, а ќе продолжи интензивно да се реализира и понатаму“.
„Наша обврска и заложба е да работиме согласно потребите на граѓаните и да реализираме проекти кои ќе донесат подобра иднина во Аеродром. Таквото работење ќе продолжи и со буџетот за 2023 година кои ќе биде најразвојниот буџет до сега, направен согласно потребите, барањата и идеите на аеродромци“ стои во соопштението од општина Аеродром.
