Главниот директор на украинската нуклеарна централа Запорожје под руска окупација е уапсен од руската патрола, објави Енергоатом, државната компанија задолжена за електраната.
Ихор Мурашов бил приведен на пат од најголемата европска нуклеарна централа до градот Енерходар во петокот околу 16 часот, изјави директорот на компанијата Петро Котин.
„Тој беше извлечен од автомобилот и со врзани очи одведен во непознат правец“, напиша Котин на „Телеграм“, додавајќи дека во моментот нема информации за судбината на Мурашов.
Украина ги повика руските сили „веднаш да престанат со актите на нуклеарен тероризам против раководството и персоналот“ на електраната и да го ослободат Мурашов.
„Мурашов ја сноси главната и ексклузивна одговорност за нуклеарната и радијационата безбедност на електраната и неговото приведување ја загрозува безбедноста на работата на украинската и најголемата нуклеарна централа во Европа“, рече Котин.
Електраната Запорожје е една од централните точки на руската седуммесечна инвазија на Украина, додека Москва и Киев меѓусебно се обвинуваат за гранатирање на централата, ризикувајќи нуклеарна катастрофа.
Украинскиот претседател Володимир Зеленски повика на демилитаризација на областа околу електраната, каде што работат Украинците.
