Премиерот Димитар Ковачевски се обрати на настан по повод презентација на „Проектот за поврзување на локалните патишта”. На настанот свои обраќања имаа и министрите за транспорт и врски Благој Бочварски, за внатрешни работи Оливер Спасовски, а свое видеообраќање имаше и Масимилијано Паолучи, директор на канцеларијата на Светска банка во земјава.
Премиерот Ковачевски истакна дека преку овој проект, со 70 милиони евра обезбедуваме подобра инфраструктура и ги реконструираме локалните улици и патишта во сите 80 општини низ државата и Град Скопје.
„Ова е најкрупниот и најзначаен проект за општините, каде со директна помош се подобрува инфраструктурата на локално ниво. Проектот се реализира од 2020 година и до сега се опфатени над 90 улици во 44 општини. Согласно планот, вкупно за реконструкција се планирани околу 450 километри локални улици и патишта во сите 80 општини, до 2024 година. Еден од стратешките приоритети на Владата е развој на функционална, безбедна и одржлива инфраструктура како клучен фактор за создавање рамнотежа во економијата и во општествениот и регионален развој, заштита на животната средина и подобрување на конкурентноста во државата. Развиена локална инфраструктура, значи и развиена економија. Со овој проект обезбедуваме подобра инфраструктура во општините, го олеснуваме животот на граѓаните, го подобруваме урбаното живеење, обезбедуваме локален економски развој, безбедност во сообраќајот и подобра комуникација меѓу граѓаните. Општините добиваат неповратни средства што е од огромна корист за нив да се реконструираат улици и патишта кои се приоритетни за граѓаните“, рече Ковачевски.
Во своето обраќање премиерот Ковачевски истакна дека само преку пет поголеми проекти, меѓу кои и „Проектот за поврзување на локалните патишта“, инвестирани се над 250 милиони евра во општините.
Министерот Бочварски рече дека инвестициите во инфраструктурата се од клучно значење за економскиот раст и развој на државата.
„Посебно ако тие директно се насочени кон општините заради локален економски развој, но и подобрување на урбаното живеење на граѓаните. Во овој период посетив голем број општини, остварив средби со градоначалниците, граѓаните и општинската администрација и секаде ги имавме истите предизвици, а тоа е реализација на крупни проекти во општините за подобрување на локалната патна инфраструктура.
Сите се согласуваме со оправданоста и целта на овој проект. Рехабилитацијата на локалната патна мрежа, верувам дека ќе се согласите, е прв и основен приоритет за граѓаните, за економијата, но и подобрување на безбедноста во сообраќајот.
Масимилијано Паолучи од Светска банка во своето видеообраќање, истакна дека Северна Македонија прави сериозни напори за подобрување на локалните патишта. Зборуваше за важноста на проектот и зајакнување на капацитетите за подобрување на локалната инфраструктура со цел подобрување на животот на граѓаните на локално ниво.
