„Католичката црква мора да ги третира случаите на сексуална злоупотреба со „нулта толеранција“, рече папата Франциск, опишувајќи ги како „монструозни“, во интервју за португалски телевизиски канал.
„Тоа е многу јасно. Нула толеранција. Свештеникот не може да продолжи да биде свештеник ако е агресор. Не може затоа што е или болен или криминалец“ – рече Папата во интервју за „TVI/CNN Portugal“.
„Тоа е монструозно, бидејќи уништува животи“, додаде тој.
Независната комисија, чија работа започна на почетокот на годината, треба да ги истражи случаите на сексуална злоупотреба во црквата во Португалија, земја со силна католичка традиција.
Таа комисија, создадена на иницијатива на Црквата, веќе има собрано околу 400 сведоштва, од кои 17 се предадени на судството.
Папата посочи дека има намера да ја посети Португалија за време на следниот Светски ден на младите, глобален состанок на младите католици што ќе се одржи од 1 до 6 август 2023 година.
