Кинеската војска за денеска најави нови вежби на море и на небото околу Тајван.
Источната борбена команда на Народноослободителната војска на Кина објави на социјалната мрежа Веибо дека ќе вежба да изведува напади против подморници на море, пренесува „Ројтерс“.
По минатонеделната посета на претседателката на Претставничкиот дом на САД, Ненси Пелоси на Тајван, кинеската војска започна големи воени вежби со употреба на боева муниција во водите околу тој остров. Непосредно пред крајот на вежбите, 10 воени бродови од двете страни маневрираа околу централната линија на Тајванскиот теснец.
Тајван соопшти дека за време на вежбите, неколку кинески бродови и авиони ја преминале централната линија. Во исто време, војската на Тајван распореди бродови и авиони, како и ракетни системи за следење на ситуацијата.
Кинеските власти претходно најавија дека ќе ги преземат сите достапни контрамерки како одговор на посетата на Пелоси на Тајван, која ја окарактеризираа како „играње со оган“.